Официјално отворена во јануари 2016 година, меѓународната компанија со седиште во Кипар ја почна својата работа во Македонија поврзана со финансиски услуги и тргување. Најавите се дека во Икс трејд до 2018 година ќе бидат вработени 100 лица, од кои првите 50 до крајот на 2016.
Ова ветување, во делот на вработувањата е остварено, па до ноември 2016 година во оваа фирма имало 47 вработени лица.
Меѓународната компанија се занимава со он-лајн тргување на светскиот девизен пазар. Но, на интернет можат да се најдат голем број сведоштва на лица кои биле измамени со ваквиот начин на тргување и изгубиле огромни суми пари.
„Со МТС Трејдинг Солушнс ние се стремиме да ги обучиме нашите вработени и да го прошириме нашето присуство на другите европски пазари“, изјави Шејла Кампањано, директор на „ИКС- трејд“ на официјалното отворање.
Во земјава, Икс трејд функционира под името МТС Трејдинг Солушнс.
Министерот Џери Наумоф рече дека оваа инвестиција ќе помогне во намалување на невработеноста и задржување на високообразованата младина во земјата.
Фирмата е основана во октомври 2015 година со паричен влог од 5 илјади евра. До крајот на 2015, фирмата имала нетековни средства од околу 47 илјади евра.
Последно ажурирање: 04 април 2017 год.